حكاية البنت الموكوسة
تعالو اسمعوا حكايه البنت موكوسه
قرتها وعجبتنى وحبيت تقروها معايا
جائني يا آعـزائـى يا كرام .. نوادر وحكايات وكلام
عن بنت ثلاثينية .. غارقة في الظلام
وعرسان مقشفين .. غرقانين في الاوهام
وعن امهات العرسان المفترية..اللي بتاكل اللحمة نية
وبتشرب عصير زلط في الصبحية
تعبوا البنية وشلفطوها ..وبجهلهم خبطوها
احكي يا بت يا موكوسه عن النكسة
والعرسان اللي جابتلك الوكسة
يتبع
كانت البت موكوسه .. لسة صغننة ومبسوطة
لحد ما جه اليوم التعيس .. اللي اتقدملها فيه عريس ..
بيقولوا دكتور ومتعلم .. وابن ناس ومتهندم
فندهلها ابوها وسألها ..
وخدلها موعد عشان العريس يقابلها
- شوفي يا بنتي ..
- ايوة يا بابا
- الشاب كويس .. دكتور وبيحضر ماجستير .. وحالته المادية ماشاء الله واخلاق عالية ومهذب اوي لا عمره كلم بنت ولا عمره مشي مع بنت ... وسنه مناسب لسنك عنده 26 يعني اكبر منك بـ3 سنين ... قلتي ايه ؟
- .....
- اقوله ييجي بكرة ؟؟
- اللي تشوفه يا بابا
هيييييييييييييييه هتجوز
ماما : انتي هتخرجي للعريس كده ؟
- ماله كده يا ماما ...
- حطي حاجة على وشك ... شوية كحل شوية روج !
- حطيت يا ماما بس مش كتير .. يقول عليه ايه ما صدقت !
- طب يلا ادخلي ..
مش قادرة .. وقفت على باب الصالون ... مش قادرة بجد .. موقف وحش اوي
اختي : ادخلي بقى .....
ايد زقتني من ورا ... لقيت نفسي في الصالون .. تحت الأمر الواقع
فاضطريت اكمل : أأ ... السلام عليكم ...
العريس وقف : وعليكم السلام ورحمة الله ... بسم الله ماشاء الله
وعمالة اقرب .. هو ده ! .. هو في حد وحش كده !!
طب هو كده واقف كله ؟ كامل يعني ؟ ... قصير اوي ..!
يلا معلش مش مشكلة الطول
طب هو اقرع ولا انا بيتهيألي ؟
قربت اكتر ....
آه اقرع يا موكوسه... اقرع وبالثلث ..
يلا معلش مش مهم القرعة
بتحصل كتير
انما ايه اللي هو لابسه ده ؟ ..
كرافتة كاروهات ! .. قميص كاروهات ! .. بدلة مقلمة !
ايه تضارب الالوان ده ! .. كنت هصرخ في وسط الصالون بصوت مجلجل واقول :
جتنا نيلة في حظنا الهباب حكاية البنت الموكوسة
لا ياموكوسه ..اعقلي .. الراجل مش بشكله ولا لبسه ..
الراجل بأخلاقه .. يلا معلش ... بكره تعلميه ازاي يلبس .. المهم يكون طيب .. ولا ايه ؟
ايوة صحيح .. المهم يكون طيب .. هحاول ابلع منظره
قعدت على الكرسي بعد ما خيبة الأمل تغلغلت جوايا ...
العريس : ازيك يا انسة موكوسه؟
انا بصوت مبحوح من كتر الاحراج : الحمدلله
العريس : ايه مالك زعلانة ليه ؟
( هو باين عليا اوي كده ! .. انما هكون زعلانة من ايه ! .. من وسامتك المفرطة )
بابا : اصلها كانت تعبانة النهاردة شوية ... ها ها ها
( انا كنت تعبانة ؟ امتى ده )
بعد السلام والتحية وشوية المجاملات ...
العريس : قوليلي يا آنسةموكوسه.. حضرتك ليه اخترتي كلية الاقتصاد والعلوم السياسية ؟
- انا كنت اتمنى ادخل صيدلة بس مجموعي في الثانوية العامة كان ....
بابا قاطعني : احم .. هي اختارت الكلية دي عشان كانت شايفة انها مناسبة لشخصيتها اكتر ...
العريس : برضو مافهمتش انتي اخترتيها ليه يعني ؟
موكوسه: .... عشان .. شفت انها ملائمة ليا
العريس بيتساءل بحيرة : .......... يعني اخترتيها ليه ؟
( ... سلامة الفهم ! )
بابا : ... آآآآ .... على فكرة يا دكتور .. مخبوطة بترسم ...
العريس : اووووه بجد ! طب يا ريت نشوف شوية من رسوماتك يا آنسة موكوسه...
موكوسة : طب عن اذنكوا .. ثواني ..
مشيت وعيون العريس عمالة تخبط فيا زي الرصاص
جبت الرسومات بتاعتي واديتهم للعريس .. راح مسكهم من غير ما يبص فيهم وحطهم جمبه على التربيزة ...
ايه قلة الذوق دي ..
مش عايز تشوفهم اومال قومتني اجيبهم ليه طيب ! .. آآآآآآآآه ... ده كان عايز يتفرج على جمال خطوتي بقى !!
هاهاها .. انت عريس خلبوص صحيح
العريس : صحيح كنتي بتدرسي ازاي وسط القصف واللي بيحصل ده ..
انا : والله حاولت اتأقلم عشان ..
قام مقاطعني ومدور وشه لبابا : شارون ده بجد ياعمي لا يمكن يكون معاه مفاوضات ...
( ايه يا ابني انت مش قاعدة بكلمك ! )
العريس : عايز اسألك سؤال يا آنسة موكوسه بس محرج شوية ..
بابا : اتفضل يا ابني خد راحتك ...
العريس : هو انتي لما كنتي في الجامعة .. كنتي بتخرجي القصة بتاعتك برا الايشارب زي ما البنات بيعملوا ؟
- هاه ؟ لا ...
العريس : طب كنتي بتقعدي مع شبان ؟
( ده انت زودتها اوي )
بابا : يا ابني احنا بناتنا مش بتوع الكلام ده ! انت هتزعلني منك ولا ايه ؟
العريس : انا آسف يا عمي والله مش قصدي اللي فهمته ارجوك ما تكونش زعلت مني ...
بابا : هففففففف ... خلاص حصل خير
العريس : معلش هتعبك معايا ممكن بس مناديل كلينكس اذا تكرمتي ..
( انت كل شوية هتقومني .. ما تحترم نفسك ياد انت ! )
انا : اوكي .. ثواني
و لسوء الحظ ( او يمكن لحسن الحظ ) كان عندنا قبلها بيوم عزومة وكل الكلينكس اللي عندنا خلص بدور مالقيتش .. لقيت في اوضتي علبة كلينكس حجم كبير .. بس مافيهاش الا 3 ورقات في آخرها ... اعمل ايه ! ..
اختي قالتلي خديهم في ايدك واديهم له ..عيب تاخدي العلبة الكبيرة دي وهي فاضية كده ... رحت طويتهم في ايدي كده زي الشطار ورحت للعريس مديتله ايدي :
- اتفضل ..
بصلي من فوق لتحت وقال : لا متشكر .. معايا
( لا لا لا .. انت الظاهر كده عندك انفصام في الشخصية ! ... )
استغربت من تصرفه ده .. وحطيت الكلينكس على التربيزة بعصبية وقعدت .. نقول ايه .. لو بينفع نشتري الذوق كنا اشتريناه
العريس بمنتهى الحداقة : ما سألتينيش يعني يا آنسةموكوسه... خليتك تيجيبي الكلينكس ليه مع ان معايا كلينكس
( يا واد يا فتك !!!!! )
موكوسه: اصل انا عندي ذوق وما بحبش احرج حد
بابا : ايه يا ابني مالك كده في ايه ؟؟؟
العريس : مش قصدي حاجة يا عمي بس كان قصدي اوجهها واقولها غلط الطريقة اللي قدمتلي فيها الكلينكس دي !
( ده انت نهارك مش فايت النهاردة !! )
بابا : خشي انتي جوة يا موكوسه
ماكدبتش خبر وجريت على اوضتي .. ايه الخيبة القوية دي
وانا اللي فرحت ان جالي عريس !
اختي : هاه ايه الاخبار ..
انا : لا مستحيل اتجوزه ... انا عمري ما شفت حد قليل ذوق بالشكل ده ! ... ده مريض نفسي !
- يعني خلاص ! .... جت الحزينة تفرح !
- لقت واحد عفش في المطرح
بعد شوية جه بابا : الراجل روح .. ايه رأيك فيه ؟ هو غبي بس يعني لو ...
انا : لا يا بابا انا مش موافقة ...لا يمكن
بابا : طب اصبري انا كلمته وفهمته ان ده غلط واعتذر لأنه كان مرتبك وقعد ساعة يتأسف ...
انا : لا لا .... دي حركات مقصودة ...
بابا : عموما .. هو قال هيتصل بعدين .. وانتي حرة
انا : لا مستحيــــــل !!
في المساء : ترررررررررررن تررررررررررررن
- آلو .. أهلا يا ابني مساء النور ... اه الحمدلله ... آه .. ممممم
انت شاب محترم يا ابني وكل حاجة بس .. البنت مش موافقة .... مصممة ايوة ..... ايوة ممكن تكلمها .... ياموكوسه ...موكووووووووسه.... تعالي الدكتور عايز يتكلم معاكي ...
اداني بابا السماعة وهو بيشاورلي اخلص بسرعة
- آلو .. مساء النور
- ايه يا آنسة موكوسه زعلانة ليه
- مش زعلانة .. بس كل شيئ قسمة ونصيب
- وليه قررتي بالسرعة دي ان مفيش نصيب ؟
( يادي الاحراج ! بتدققوا في السؤال ليه ؟ لازم نقولها في وشكوا يعني .. اننا ما بنتجوزش مجانين ! )
- اصل بصراحة حسيت ان مفيش بينا تقارب او تفاهم و ...
- ليه مفيش بينا تقارب .. هو انا بصلي الصبح ركعتين وانتي بتصليه خمس ركعات !
- ايه دخل الصلاة في الموضوع ! كل المسلمين بيصلوا زي بعض !
- يبقى مفيش اختلاف في الأمور الجوهرية .. انا مسلم وانتي مسلمة
- يا سلام ! ... شوف يا دكتور بصراحة انا آسفة اوي و
- شوفي يا آنسة مخبوطة .. انا لما كنت بدرس كنت بحفظ العملية الجراحية من اول مرة يعملها الجراح قدامي .. وكنت بحب اوضة العمليات اوي .. لدرجة اني كنت ببات فيها .. ومرة واحدة ست كانت بتولد قيصري و ...
- حضرتك بتقولي الكلام ده ليه دلوقت دخله ايه في موضوعنا ؟
- اصل انتي شايفة ان مفيش بينا تقارب في الشخصية عشان انا دارس طب وانتي اقتصاد بس احب اقولك بالعكس ده شيئ تكميلي مش محل خلاف و ...
- حضرتك ايه دخل الدراسة انا مش قصدي كده !
- اومال ايه ؟
( اقوله ايه ده !!! )
- انا فكرت كويس وخدت قراري وكل شيئ قسمة ونصيب
- ازاي يعني قررتي .. اذا كنت انا موافق وابوكي وامك موافقين يعني احنا كده تلاتة موافقين يعني الاغلبية
( اغلبية ايه ياد هي انتخابات ؟ )
- انا اللي هتجوز مش بابا ولا ماما ...
- وانا !
- انت انسان كويس بس الجواز قسمة و نصيب .. ممكن بعد اذنك عشان عايزة انام ؟
- آنسة موكوسه ممكن اسألك بصراحة ...
( اللهم طولك يا روح )
- اتفضل اسأل ..
- انتي بتحبي حد تاني مش كده ؟
- تصبح على خير ...
و قفلت موكوسه سماعة التليفون
في وش هذا العريس المجنون ...
للأسف ما بقتش تنفع الشهادة ... اللي مش محسنة لصاحبها عادة
هو فاكر نفسه جاي يخطب بنت ناس
ولا يشتري سجادة !
وحطت مخبوطة ايدها على خدها .. بتفكر في الاشكال اللي بتتقدملها
داعية ربها يريحها من هذه النوعية
اللي كانت السبب .. في خيبتنا العربية القوية
يتبع
البت موكوسه اتخطبت .. واتقرت فاتحها
وبكلمة آآآمين اتختمت
- شوفي يا بنتي ..
- ايوة يا بابا
- الشاب ممتاز جدا انا سألت عليه وكل الناس شكرت فيه .. دكتور اسنان بيحضر ماجستير في امراض اللثة .. وحالته المادية ماشاء الله ... بيشتغل في مؤسسة للأسنان ده غير العيادة بتاعته .. وعنده 30 سنة يعني اكبر منك بـ 5 سنين ... ايه رأيك ؟
- ....
- اقوله ييجي بكرة ؟
- اللي تشوفه يا بابا
هييييييييييييييه هتجوز
- انتي هتخرجي للعريس كده ؟ وبعدين معاكي ؟
- ماله كده يا ماما ...
- حطي حاجة على وشك ... مش كل يوم هيجي عريس كويس كده !
- حطيت يا ماما .. عايزاني ابقى اراجوز عشان اعجبه !
- طب يلا ادخلي ..
مش قادرة .. وقفت على باب الصالون . يارب المرة دي تكون اخر مرة اشوف فيها الموقف الوحش ده
اهئ اهئ
اخويا : ادخلي يا بنتي يلا ..
- انت شفته ؟
- ايوة .. راجل ماشاء الله مالي مركزه
- بجد ؟
- لا مش بجد هو شبه الزبالين .. يابت بطلي عبط وادخلي ده لو عجبتيه احمدي ربنا
وانا داخلة : أأ .. السلام عليكم ...
العريس وقف : وعليكم السلام ورحمة الله ... بسم الله ماشاء الله
هو ده ! .. هو مش حلو اوي ..
بس شكله احسن من الدكتور العبيط اللي كان قبله بكتير ... ولابس كويس .. فاضل ايه ؟
فاضل التأكد من سلامة قواه العقلية
العريس : ايه يا آنسة موكوسه مين مزعلك ؟
( انتوا كلكوا كده ولا ايه ! )
بابا : اصلها كانت تعبانة النهاردة شوية ... ها ها ها
( ايه يا بابا ده ! مش كل مرة ! )
العريس : لا سلامتك ألف سلامة
انا بصوت مبحوح من الكسوف : .. الله يسلمك
العريس : باباكي قالي انك ناوية تكملي ماجستير صحيح ؟
انا : ان شاء الله ربنا يسهل
بابا : موكوسه بنت طموحة ...
العريس : ماشاء الله والله يا آنسة موكوسه انا اعجبت بحضرتك من قبل ما اشوفك .. انا احترم الفتاة اللي بتهتم انها تكمل تعليمها وانا هشجعك ان شاء الله للنهاية
انا : ... ربنا يخليك
( الحمدلله .. لحد دلوقتي مفيش اعراض شيزوفيرنيا )
العريس : آنسة موكوسه ... ممكن اسأل سؤال ؟
( ربنا يستر )
انا : ايوة اتفضل
العريس : انتي ليه درستي اقتصاد وعلوم سياسية مش شايفة انه مجال ينفع للرجالة اكتر ؟
انا : لا شايفة انه ينفع للكل ...
العريس : طب اخترتيها ليه طموحك تبقي وزيرة مثلا ؟
( ابتدينا في العبط بقى ! )
انا : لا طبعا مش شرط بس ... يعني ... اصل ...
بابا : .. أأأأ .... هي درستها لأنها كلية مهمة وبتدي الطالب ثقافة عالية وبعدين يا سيدي انت بعد كده حر عايزها تبقى وزيرة عايزها تقعد في البيت ده شيئ يخصك .. ها ها ها
العريس : هاهاها ياعمي مش قصدي والله بس انا يعني حبيت اعرف طبيعتها لتكون بتحب السياسة والمشاكل وكده يعني ...
بابا : لا يا ابني .. بنتي ما بتمارسش اي نشاط هي بتدرس بس
العريس : ماشاء الله يا عمي ربنا يبارك فيكو ... آنسة موكوسه ممكن سؤال ؟
( هااه ... اتحفني ... )
انا : ايوة اتفضل
العريس : انتي موافقة ؟
انا : على ايه ؟
العريس : عليه !
( من اولها كده ... ! )
بابا : ان شاء الله خير يا ابني انت قلقان ولا ايه ؟ ها ها ها
العريس : والله يا عمي ما هيجيلي نوم الا لما اعرف رأيها ... اذا سمحتلي يعني ...
بابا : مبدئيا يا موكوسه ايه رأيك في الموضوع ؟
( هو انا اعرفك يا راجل انت عشان اقول رأيي من دلوقتي ! )
انا : ... مبدئيا ... يعني ... ان شاء الله خير
العريس : يعني موافقة ؟
بابا : ......... قولي ما تتكسفيش ... اتكلمي عادي ..
( ايه يا بابا خايف على العريس اللقطة ليطير اوي كده )
انا : ان شاء الله ..
العريس : الحمدلله ...
بابا : اخيرا وافقتي ! ... اخيرا !! .. ده انتي طلعتي عيني
( يادي الفضايح .. يا بابا مش قدام الراجل .. )
بابا : موكوسه روحي قولي لماما تعملنا قهوة ...
جريت على اوضتي ..
اختي : هاه ايه الأخبار ؟
انا : والله مش عارفة ... محتارة شوية
- يا ستي وافقي وخلاص ...
- مش عارفة هو اهبل شوية ولا انا بتهيألي ؟
- بصي العريس في اول قعدة بيكون مرتبك ويعك في الكلام انتي لازم تعذريه ... وصدقيني الرجالة دول مش هتلاقي فيهم الكامل اوي يعني ... الا ما يطلع فيه علة ... بس عموما لازم الحياة تمشي ... كلنا بنشتكي من جوازنا اهه مين مرتاح !
- على رأيك
بعد شوية جه بابا : الراجل روح .. ايه رأيك فيه ؟ بقولك ايه ... ما تطلعليش القطط الفطسانة فيه.. الراجل كويس واحسن من كل اللي قبله ... احمدي ربنا بقى ومش عايز كلام كتير ... قلتي ايه ؟
انا : اللي تشوفه يا بابا ...
وقرينا الفاتحة ..
لولولولولولولولولولوي
صاحبتي : ايوة يا عم مين قدك .. هتعملي ايه يا موكوسه في كل المهر ده ! ...
( بتقروا علينا ولا ايه )
انا : مش لما نكتب الكتاب واخد المهر الأول
- يا ستي ادينا بندردش ...
- مش عارفة بفكر اشتري عربية .. ايه رأيك ؟
- فكرة هايلة ... والدهب جيبيه كله من داماس .. اعرف وحدة خياطة يا موكوسه تهبل ... وكوافير شاطرة اوي .. لما يرجع خطيبك من السفر انا هعملك كل حاجة ... نفسي اشوف شكله اوي .. على فكرة انا شفت امبارح دكتور سألني عنك
- مين ده معرفوش
- انما ايه زي القمر .. قلت يا خسارة لو كنا عرفناك قبل ما موكوسه تتخطب ... يمكن كنت انت من نصيبها .. انا متأكدة انه احلى من خطيبك ... خسارة اصله امور اوي
- ...... انا عارفة بقى كل شيئ قسمة ونصيب
ومرت الايام ....
خطيبي : آلو .. ايوة يا موكوسه ازيك ..
انا : هترجع امتى كل مرة تقولي بعد اسبوع وبعدين تأجل ..
- معلش بقى ظروف .. عايزة حاجة اجيبهالك معايا ؟
- لا سلامتك .. المهم ترجع بالسلامة
( انا قلبي مش متطمن وحاسة كده ان الخطوبة دي مش هتتم )
بابا : خطيبك ماقالش راجع امتى ؟
انا : لا يا بابا ..
ترررررررررن تررررررررررن
خطيبي : ايوة يا موكوسه ... انا عندي مشكلة
انا : مشكلة ايه ؟
- ماما ...
- مالها ؟
- عايزاني اخطب بنت خالتي .. وبصراحة مش مخلياني اسافر عشان اتمم الموضوع ..
- يا سلام ! .. تخطبها وانت خاطبني ازاي يعني ؟؟
- مخبوطة هي مش عايزة تجوزني من غير ما تشوف العروسة ..
- طب اعمل ايه اسافر لها ؟ !!
- انتي عارفة مخ الستات الكبار ... عايزة تشوفك كويس لأنها شايفة ان الصور مش كفاية .. مستعد ادفعلك تمن التذكرة بس تعالي ..
- لا طبعا مش جاية .. هو انا فرجة !!
- انا مش عارف اعمل ايه
- براحتك ... عايز تخطب بنت خالتك انت حر
- لا مش عايز والا كنت خطبتها من الأول .. بس ماما ..
- لو مش قادر تقرر سيب ماما هي اللي تقرر ..
وطرااااااااااخ قفلت موكوسه السماعة في وش خطيبها اللي ماعندوش شخصية
اتصل خطيبها في أبوها وحاول يقنعه يخلي موكوسه تسافر عشان مامته تتفرج عليها وتقرر اذا يتجوزها ولا لا ...
ابوها مارضيش
وقال
فرررررررركشششششش
صاحبتي : بجد !... فسختوا الخطوبة ؟!
( هي مالها فرحانة كده ليه ! )
انا : ايوة فسختها ..
- انتي زعلانة ليه مش انتي ماكنتيش بتحبيه ؟
- ايوة بس يعني الموقف مش حلو ..
- انتي لسة صغيرة وبكرة ييجي اللي احسن منه .. فاكرة الدكتور الامور اللي قلتلك عليه ؟
- ماله ؟
- مش طلع خاطب !!!!
انا : هاه ...
وبعد ما جت الطوبة في المعطوبة ... وانتهت لموكوسه اول خطوبة ..
بسبب ان العريس دلوع امه
اللي كانت مسيطرة على دماغه وفهمه
وقالتله لازم اشوفها واتفحصها ... واقطعها وادوقها وابلعها
وكأن البت موكوسه بطيخة
ولا يمكن حتة فسيخة
عايزة تقرب عليها وتشمها .. وتشد شعرها وتلمها
عشان مش واثقة
في ذوق المحروس ابنها
والخايب بدل ما يقولها عيب ... قعد يعيط لمخبوطة ده اسم الدلع الجديدلموكوسه
شباب الزمان ده
بجد شباب عجيب
وحطت مخبوطة ايدها على خدها .. بتفكر في الاشكال اللي بتتقدملها
داعية ربها يريحها من هذه النوعية
يتبع
الخطوبه التانيه
البت موكوسه او مخبوطة اللى تحبو تندهوها بيه من بختها المعجباني ...
اتنيلت على عينها
واتخطبت تاني
لعريس طويل القامة ... مفلطح الهامة
شديد الشبه لباراك أوباما
الحوار ايه
- شوفي يا بنتي ..
- ايوة يا بابا
- الشاب كويس .. تاجر ناجح ومقتدر مادياً .. سألت صحابه عنه قالولي عنه كلام طيب وكويس ... وعنده 30 سنة يعني اكبر منك بخمس سنين .. سبحان الله اهه ربنا بعته بعد فسخ خطوبتك على طول شفتي ربنا كريم ازاي
- ودرس ايه ؟
- هو لسة مسجل في الجامعة انتساب وبيدرس لغة عربية ..
- ايه يا بابا يعني مفيش معاه شهادة جامعة على الأقل ... ده انا بحضر ماجستير وكنت مخطوبة لدكتور !
- بقولك ايه الراجل محترم وده اهم حاجة .. ومقتدر مادياً مش هيحوجك لحد .. وشهادة الجامعة اهو بيدرس يعني عنده طموح وهياخدها في الآخر .. سيبك من كلام الناس ......... هااااه قلتي ايه ؟؟؟
- .....
- اقوله ييجي بكرة ؟؟
- اللي تشوفه يا بابا
هييييييييه هتجوز
- انتي هتخرجي للعريس كده ؟
- ايوة يا ماما
- طيب براحتك .. يلا ادخلي ..
( دخلت الصالون بدون تردد .. منا على وشك الحصول على الزمالة العربية في عرسان الصالونات .. )
وانا داخلة : السلام عليكم ...
العريس وقف : وعليكم السلام ورحمة الله ... بسم الله ماشاء الله
وعمالة اقرب .. هو ده ! ... يااااااااااه كل ده طول .. هيخبط في السقف ! .. ومال نص شعره ابيض كده ! ..
طب راعي شعوري واصبغ شعرك !!
مش كفاية مفيش شهادة
اعقلي يا بت يا مخبوطة .. الراجل مش بطوله ولا شعره .. الراجل بأخلاقه .. بلسانه .. بكرمه ..
هو صحيح ممكن يكون مقلب ومافيهوش ولا وحدة من الصفات الكريمة دي .. لكن برضو بلاش تظلميه
ويقعدوا يقولوا البنات هما اللي جابوا لنفسيهم الكافية
بيعنسواعشان بيدققوا في شهادات العريس ..
وايه يعني لو كان عصامي وبنى نفسه وبعد ما استقر ماديا اتعلم وخد شهادة ؟ ...
ويا ستي ما تزعليش ..
كل ما هنالك ان الحكاية اتعكست
بدل ما يتخرج من الجامعة ويسجل اسمه بعدها في احصائيات البطالة
ويبقى شبه مقيم في كل قهاوي البلد وحريف كوتشينة وطاولة ..
لا .. كده انتي قديمة يا موكوسه
قصدك هيبقى مقيم في كل كافيهات النت اللي في البلد وحريف فيس بوك وهكر وقاعد طول النهار عمال يحضر ابحاث ودراسات عن كيفية سرقة ايميلات وصور البنات ..
وبعدين يلاقي وظيفة نص كم يحوش منها كل شهر نص جنيه
وبعد ربع قرن يروح متجوز ...
لا
العريس ده بقى ريحك ... اشتغل وكون نفسه الاول ...ولغى مرحلة التعارف على الفيس بوك وسرقة الايملات من حياته
لأنه هيدرس وهو مشغول في البزنس بتاعه
ومش هيلحق يتعلم الهكر
وجهة نظر برضو
وبعد ما بصيت على العريس بصعوبة بسبب النور الذي تعكسه الخصلات الشايبة في شعره ... اللي خلت عينيا تزغلل
حاولت اقنع نفسي باستماتة
ان سواد شعر العريس لا يعني بالضرورة اني هكون زوجة سعيدة
العريس حس ان عينيا بتغمض وبتفتح لوحدها
فالتفتلي وهو مبتسم ..
العريس : ازيك يا انسةموكوسه ؟
انا بدون اي كسوف او احراج : الحمدلله
العريس : قوليلي يا آنسةموكوسه.. انتي بتعملي ايه دلوقتي ؟
- في الدبلومة
- يعني خلصتي جامعة مش كده ؟
- .... هه .. ايوة خلصت .. ماهي الدبلومة للماجستير
- هاهاها .. اصلي بصراحة معرفش في الحاجات دي ماليش فيها
انا : .....
بابا : ... أأأأأ ... اخبار شغلك ايه كلمنا عنه شوية ؟
- والله يا عمي انا خلصت تشطيب في مكتب العربيات بتاعي .. وحالياً دخلت من الجمرك 10 عربيات .. كلفوني كتير ..
وابتسم وبصلي : وان شاء الله وحدة منهم هدية للآنسة موكوسه
( متشكرين يا خويا )
بابا : يا ابني احنا يهمنا الراجل مش العربيات ..
العريس : ده أقل حاجة ممكن اقدمها للآنسةموكوسه يا عمي .. صحيح يا آنسة موكوسه نوع موبايلك ايه ؟
انا : نوكيا 7250
العريس : لا لا لا .. ان شاء الله هجيبلك واحد محدش مسكه قبلك .. جبت لأختي واحد بألف دولار ..
(قصدك ايه ياد ؟؟ مش عاجبك الموبايل بتاعي ؟؟؟! )
العريس : عارفة يا آنسة موكوسه اختي دي فرحها كلفني 30 ألف دولار ... عقبالنا ان شاء الله
بابا : يا ابني مش مهم كل الكلام ده المهم الاحترام والمعاملة بما يرضي الله
العريس : طبعا طبعا يا عمي ربنا ما يجيب حاجة وحشة
بابا : قومي يا مخبوطة قولي لماما تعملنا قهوة ( وغمزلي )
وجريت على اوضتي .... وهاتك يا عياط
ماما : ايه مالك ؟
انا : يا ماما ده ما بيفهمش حاجة غير في الفلوس !!
- ..... وبعدين هنفضل كده ؟
- معرفش انا مش قابلاه وشكلنا كده مش نافعين لبعض
بعد شوية جه بابا : الراجل روح .. ايه رأيك فيه ؟
انا : يا بابا ده طول القعدة يتمنظر عليه بفلوسه ...
- انتي عايزة تعنسي ؟ لو عايزة تعنسي قولي ؟
- لا مش عايزة اعنس .. بس برضو مش عايزة اتجوز ده ..
- الراجل كويس وقلنالك هيكمل تعليمه .. هو صحيح طويل اوي .. بس الطول للراجل زينة !
( الطول زينة اه بس مش للدرجة دي 220 سم !! ... اكلمه ازاي ؟.. مفيش حل بقى الا اني كل ما هعوزه اتصل بيه .. ولا اديله رنة عشان ينخ على ركبه )
بابا : يا بنتي ... الراجل المقتدر هيريحك في حياتك .. والتعليم مسيره ياخده انتي زعلانة ليه ؟ ولو انتي شاطره شجعيه على المزاكرة
انا كان نفسي تتخطبي قوام بعد ما خطوبتك اتفسخت ... وربنا حققلنا امنيتنا
انا : ...... طيب زي ما انتوا عايزين
وقرينا الفاتحة ..
مش لولولولولولولولولولوي
وبعد قراية الفاتحة من غير نفس
مخبوطة بدأت تتعامل مع الموقف كأنه ما حصلش اصلا
اصل لو رفضت هيقعدوا يجروا ورايا من اوضة لاوضة
عشان يقنعوني اوافق عليه بكلام يفتح النفس
زي ...
لو رفضتيه هتعنسي .. والفرصة تأتي مرة واحدة
عمرك ما هيجيييييلك احسن منه ... ويفسروا في وشي
ومهما قلت انه مش مناسب ليا شخصيا
مفيش فايدة ...
اوافق عشان اثبتلهم بالتجربة العملية انه ما ينفعش ..
في ناس كده لازم يتلسعوا من النار عشان يقتنعوا انها بتحرق
فقررت مخبوطة تجاري الوضع ...
ومع الوقت
وشوية شوية ..
تحقق اللي هي عايزاه
بدون ما تتعرض للضر .. أأ .. قصدي يعني لخلافات اسرية
ماما : مخبوطة .. يا مخبوووطة ... خطيبك قاعد في الصالون البسي وروحي اقعدي معاه شوية
انا : ... طيب
لبست ورحتله في الصالون : السلام عليكم .. ازيك ؟
خطيبي : اهلا اهلا ... ازيك يا موكوسه ايه بتعملي ايه ؟
- عندي بحث وكنت بزاكر .. ما انتا عارف الامتحانات قربت
كشر وقالي : آه .. يا ستي .. ربنا يوفقك ..
- وانت اخبار مزاكرتك ايه ؟
- مزاكرة ايه ؟ ... آه آه .. يا شيخة بلا مزاكرة بلا بتاع يعني هعمل بالشهادة ايه منا الحمدلله مش محتاجها
( انا كنت حاسة من الاول !! )
- هو يعني ما بيتعلمش الا الفقرا عشان يشتغلوا بشهاداتهم ؟!
- التعليم ده للناس الخايبة ... المتعلمين بيتمنوا اشغلهم عندي !
( دي عقد نفسية بقى !! )
- يا سلام ! .. انت مش ناوي تكمل ولا ايه ؟
- ومين قالك اني ابتديت اصلا .. انا سجلت كدة بس عايز الشهادة ديكور .. انا ما بحبش القراية بتخنق منها .. المهم .. شوفي جبتلك ايه .. ايه رأيك ؟
- حلوة تسلم ايديك
- عارفة قزازة الريحة دي تمنها 100 دولار ..
- ... ميرسي
- وشوية الماكياج دول كلفوني يجي 150 دولار .. طبعا الغالي للغالي
( انت كل حاجة تجيبها هتقولي تمنها ! .. بتعايرني ولا ايه )
- ... قلنا ميرسي
وفضلت مخبوطة بعد كده تحاول تطفش خطيبها ده ..
مرة بتكشيرة
مرة بتطنيش .. مراااات بردود باردة ..
او تبصله بقرف
لكن ....... مفيش فايدة
لاااااازق لااااااازق
انا : بقولك ايه انت لازم تخلصني من الراجل ده بأي شكل
اخويا : طب اعمل ايه ! ..
انا : مش عارفة انا نفسيتي تعبانة وامتحاناتي قربت ومش عارفة ازاكر ..
اخويا : بصي ما تفكريش في اي حاجة غير مزاكرتك .. واوعدك مش هتكملي مع الراجل ده .. بس لازم تعرفي يا مخبوطة ان مفيش حد كامل ...
- عارفة .. بس مش ده ... مش ده ... مش ده
وراح اخو مخبوطة لخطيبها
- شوف عايزك في كلام رجالة .. بصراحة البنت وافقت عشان ما تزعلش بابا .. وهي مش عايزة تتجوز ... هاه قلت ايه ؟
- لا مش ممكن
- معلش حاول تفركش انت من عندك عشان هي مش عارفة تفركش ..
- طب مش هفركش
- ذنبك على جمبك بقى ...
و فضل اخو مخبوطة وجوز اختها يقنعوا في ابوها ان الراجل ده مش هيكمل تعليمه وانه ما ينفعش
واستنتجوا ان مخبوطة لو اتجوزته هتعمله عاهة مستديمة باستخدام احد ادوات المطبخ
وتاخد فيه 6 شهور وتبقى سوابق ..
اوتقتله وتترحل على عشماوي وتكون هربت من لقب عانس لتفوز بلقب المرحومة
وفي احسن الظروف هتطلق وترجعلهم بعيل
ونقول يا ريت اللي جرا ما كان ... نفركش من دلوقتي احسن
بابا - شوفي يا مخبوطة ... الراجل ده شكله كده مش ناوي يكمل تعليمه .. وانتي شكلك كده مش هتعمري معاه ........
لو مش عايزاه قولي من دلوقتي نفركش .. بصراحة انا واخوكي وجوز اختك كمان بعد ما اتعاملنا معاه ما ارتحنالوش .. نفكرش ؟
- فركش يا بابا فركش .. هيييييييييييييييه
( مش قلتلكوا .. مفيش احسن من الحلول السلمية .. ونجاري الوضع مؤقتا منعا لاراقة الدماء ... وخطوبة تفوت ولا حد يموت ... نياهاهاها )
وتخلصت مخبوطة من خطيبها المعقد ..
اللي كان عامل فيها مهند
بعد ما رجعتله كل هداياه الثمينة .. ومش عايزة منه برفان ولا زينة ..
وزاكرت مخبوط وجابت تقدير .. وجهزت نفسها لبحث الماجستير
داعية ربها يريحها من هذه النوعية
الرئيسية 
